Shaeri-2

by BM » Wed Sep 10, 2003 3:42 pm

Kaise mazaar e sang pe sajdah karey koie
 
Patthar ke devtaa ki bhi pooja karey koie.

by **shaikh** » Wed Sep 10, 2003 5:35 pm

BM, the only sher I can think of in this field is:
 
 
Ibne maryam huwa kare koyee
 
Mere dukh ki dawa kare koyee
 
 
But there is no patthar, though. Do I get any negative points?

by **Kulcha Hyderabadi** » Wed Sep 10, 2003 7:22 pm

Kyoon nahin.. Jab Ghalib ka zikr chid gaya hai to kyoon nahin?
 
 
Daayam pada huva tere dar par nahin hoon main
 
Khaak aisee zindagi pey ke patthar nahin hoon main!

by **shaikh** » Wed Sep 10, 2003 7:55 pm

Bohot khooob Bulchay bhai! Aap nay Ghalib mein bhi patthar nikaal liya. Dabbay pay giraak zara halka hai shaid.

by **Kulcha Hyderabadi** » Wed Sep 10, 2003 8:22 pm

Bhai Shaikh! Aap kab aa rahe ho dabbey par? Giraak theek hi hai, lekin aaj internet cafe per hoon, apna side-kick aaj dumma maar diya!

by **shaikh** » Wed Sep 10, 2003 8:38 pm

Bhai Kulcha,
 
 
Mai aapke dabbay po aaounga aur pata chalinga kay aap Santa Barbara mein yaa Bay Area mein meeting mein gaye huway hein. Toh kya faaida bhai, mereku paan pay discount bhi nai milenga, dekho. Aap nai hain bolke.

by **Kulcha Hyderabadi** » Wed Sep 10, 2003 8:50 pm

Areyy rahne do Shaikh bhai. Aap logaan kab aana ghareeb ke dabbey po. Yeh Bay Area yah Santa Barbara mein nai mere bhai, dabba apney shahar mein hain, wohi shahar jiska zikr Radha ne kis khoobsurati ke saath bayan kiya hai.
 
 
Rahi baat discount ki, dabba apka hai bhai, jab bhi jee chahey aayieh aur hamko khidmat ka mouqa zaroor dijeeyeh.

by **Radha** » Wed Sep 10, 2003 9:57 pm

Kulcha bhai, aap ney jis ada se paan pesh kiya to mujhey kehna hi pada. Sab log se maafi chahati hum key yeh sher patthar par nahi hai.
 
 
Lagaavat ki adaa se un ka kehna \"paan\" haazir hai,
 
Qayaamat hai, sitam hai, dil fidaa hai, jaan haazir hai.

by BM » Thu Sep 11, 2003 4:43 pm

Ek puri ghazal hey patthar per shujaa\' khawar ki.
 
 
Burayee log karte rehte hain din raat patthar ki
 
Zara ik din suni to jaaye chal kar baat patthar ki
 
 
Rahi masroofiyat meri tarah hazraat, patthar ki
 
Zamane bhar ke seeshey aur tanha zaat patthar ki
 
 
Kahani kis qadar dil doz hai hazraat patthar ki
 
Sitam hai, pattharoN ke beech tanha zaat patthar ki
 
 
Agar che hum ko bhi maloom hai auqaat patthar ki
 
Magar wahshat mein phir darkaar hain khidmaat patthar ki
 
 
Nayi duniya bani to is se bilkul mukhtalif hogi
 
Khuda sheeshey ka hoga aur makhluqaat patthar ki
 
 
Abhi kal tak ye manzar soch bhi sakta na tha koyee
 
K sheeshey baith jayeinge laga kar ghaat patthar ki
 
 
Miyaan jo aadmi sheeshey ki sangeeni ka qayil ho
 
Wahi samjhe to samjhe shiddat-e-jazbaat patthar ki
 
 
SHUJAA\' itni bhi gehri shairi acchi nahin hoti
 
Qalam hai phool sa aur likh rahe baat patther ki
 
 
By - Shujaa\' Khawar

by **Humdam** » Sat Sep 13, 2003 11:03 pm

Adaab dosto: Is guzishta hafte lafz \"patthar\" se bahot hi achey ashaar o ghazl padhne ko miley jis main \"radhaji aur Bhaimiya\" dono ne hi bahot umda nazm aur ghazlein likhi hain jis ki main dono ko saare board members ki taraf se mubarakbaad deta hoon.
 
 
Aur agle hafte yaane sunday se doosra lafz ka taqarrur karna aur main board members se guzarish karoonga ke koi lafz ka taqarrur karein...

by **\"BM\"** » Sun Sep 14, 2003 3:52 pm

Adaab dosto: Is guzishta hafte lafz \"patthar\" se bahot hi achey ashaar o ghazl padhne ko miley jis main \"Radhaji aur Bhaimiya\" dono ne hi bahot umda nazm aur ghazlein likhi hain jis ki main dono ko saare board members ki taraf se mubarakbaad deta hoon.
 
 
Aur agle hafte yaane Sunday se doosra lafz ka taqarrur karna aur main board members se guzarish karoonga ke koi lafz ka taqarrur karein...

by **Humdam** » Sun Sep 14, 2003 8:47 pm

Bhai Humda, meri rai mein is haftey ka lafz (word) \"AASMAAN\" munasib rahega. Aap sab ki kya rai hey?
 
\"BM\", 14 Sep 2003
 
 
Is hafte lafz \"AASMAAN\" janaab BM ki taraf se taqarrur par main muttafiq hoon.

by **Radha** » Sun Sep 14, 2003 10:02 pm

Sab ko mera adaab. Aasmaan par sher hazir hai.
 
 
Dil mein rahte hain bechain se kitne armaan machalte huve,
 
Kah doon, par dar hai dekhoon na main, aasmaan ko pighalte huve,
 
Aasmaan bhi haseen hai magar, apni aankhen zameen par bBhi rakh,
 
Dekhtaa hoon main har din yahaan chadhte sooraj ko dhalte huve.

by **Kulcha Hyderabadi** » Sun Sep 14, 2003 10:32 pm

Aur hamari taraf se bhi sab ki khidmat mein Farshee Salaam aur ek meetha paan! Ab rahi baat aasmaan ki, bhyee Chicha Ghalib ke khayal se kaun muqabala kar sakta hai? Aur kya khoob kaha hai Mirza Nousha ney...
 
 
Ham kahan ke daana the, kis hunr mein yakka the
 
Be sabab huva Ghalib, dushmanan aasmaan apna!

by **Saira** » Mon Sep 15, 2003 12:53 am

Ab irada hai ke pathar ke sanam pujunga... take ghabraoun tu takra bhi sakon mar bhi sakon.

by **Radha** » Mon Sep 15, 2003 12:33 pm

Kulcha bhai, wah bahut khoob. Mirza Ghalib ka ek aur sher hazir hai:
 
 
Giri jis chaman pe bijli voh mera aashiyaan kyon ho
 
Dost ho tum jiske uska dushman aasmaan kyon ho

by **Kulcha Hyderabadi** » Mon Sep 15, 2003 2:38 pm

Ek Iqbal bhai ki taraf se...arey bhai apney cycle stand waley Iqbal bhai nahin...Allama Iqbal
 
 Isee roz o shab mein ulajh kar na rah ja
 Ke tere zamaan wa makaan aur bhi hain
 Tu shaheen hai parwaaz kaam hai tera
 Tere saamney Aasmaan aur bhi hain

by **\"BM\"** » Mon Sep 15, 2003 3:39 pm

Aasmaan se hum utarte hi nahin the jin dinon
 
Yaad aa jati hai aksar un dinon ki in dinon

by **Kulcha Hyderabadi** » Mon Sep 15, 2003 6:09 pm

Yeh bahut pasand hai kisee ko! Apan number one ke bundlebaaz hai so uskoo nai maloom!!!
 
 
Kaisee haseen aaj sitaron ki raat hai
 
Ek chand aasmaan pey hai ek mere saath hai

by **Humdam** » Mon Sep 15, 2003 8:07 pm

Wah bahot khoob! Sab ke ashaar bahot acche hain spl. kulcha bhai ke.
 
 
Tumhari yaad jab aayee tumhey jab dekhna cha ha
 
Dekh aasmaan ke chand tarey hasrat mita daali

by **\"BM\"** » Mon Sep 15, 2003 9:31 pm

Ilaaj tere taghaful ne kar diya iska
 
Bahut dinon se dimaagh aasmaan pe tha dil ka
 
 
Main aasmaan-e-muhabat se rukhsat-e-shab hon
 
Tera khayaal koyi doobata sitaarah hai
 
 
Aasmaan kuch bhi nahin, ijz-e-basaarat ke siwaa
 
Naa rasaai hai mohabbat ki, lab-e-baam ka naam
 
 
Go main sukoon ki khaatir utraa hoon aasmaan se
 
Takmeel paa rahaa hoon aalaam-e-jaavidaan se

by **Humdam** » Tue Sep 16, 2003 11:32 pm

Mile jo saath tumhara to fikre dojahan kyun ho
 
hue tum dost jiske uska dushman aasman kyun ho
 
 
Khayalon ko jab se pankh armaanon ke mile hain
 
Hum ud rahe hain tab se khwabon ke aasamaan pe
 
 
Unki mehfil ka yahi hai eik dastoor-e-hayaat
 
Jo bhi aaye tod de rishta zameen se aasmaan se

by **Kulcha Hyderabadi** » Wed Sep 17, 2003 11:09 am

Watan ki fikr kar nadaan museebat aaney wali hai
 
Teri barbadiyon ke mashwarey hain aasmaanon mein
 
 
-Allama Iqbal

by **\"BM\"** » Wed Sep 17, 2003 1:46 pm

Dekhaa Hilaal-e-Eid, to aaya tiraa khayaal
 
Wo aasmaa ka chaand hai, tu mera chaand hai

by **Kulcha Hyderabadi** » Wed Sep 17, 2003 3:49 pm

Wah bhai wah! Bahut khoob. Kya kahney! Kya baat hai BM aapki! Jeetey raho. Mazaa agaya pasha. Isee baat pey ek changeri meethey paanon ki apko free mein de raha hoon!!!

Who is online