Taaza ghazal - uska yeh saada bahaana jaan meri le gayaa

by **Bhirr Ustaad** » Tue Jul 23, 2002 6:45 am

Tammam Bhaiyoun aur bhenoun ki qidmat mey Salaam aur Aadaab, 

Ghazal kisi qadar shokh hai, agar kisi ko ehteraaz ho to muaazirat.....Kalaam ke baarey meiN apney khayaalat ka zaroor izhaar kareiN

Aap sab ki hausla afzahi se hi qalam uthaney ki himmat jutaata hooN!! 

************************************ . 

Aaj pHir woh musKuraana jaan meri le gayaa 

aankh sHarmaa kar milaana jaan meri le gayaa . 

Jaan par tha intezaar-e-yaar to bHaari bohot 

par aHad pey uskaa aana jaan meri le gayaa 

[aHad =promise] . 

Ek adaa sey apna aanchal ungliyoun meiN baandhna 

aur phir nazrein uthana jaan meri le gayaa . 

Jhoom kar angDaayi sey woh Faasloun ko toRna 

aur achanak aazmana jaan meri le gayaa . 

ek jhi-jhak se soNchnaa ta-dair aur phir bad-azeeN 

hich-kichahat se bulaana jaan meri le gayaa 

[baad-azeeN =later on] [ta-dair= for a long time] . 

dekhlegaa koi humko aB to jaane do mujhey 

uska yeh saada bahaana jaan meri le gayaa . 

ungliyoun sey apne merey baal suljHana, ke uff 

aisaa apna-pan jataana jaan meri le gayaa . 

barsar-e-Mehfil kuch lamhey churaa kar baarha 

unka woh nazreiN milaana jaan meri le gayaa . 

chaanW kar key zulf kee, apna ahd-e-ishq phir 

zer-e-lab mujh ko sunana jaan meri le gayaa 

[zer-e-lab = softly, whispering ahd= promise] . 

Merey hoNtoun sey Hayaa sey, Muskurakar aadatan 

unka woh laali mitaana jaan meri le gayaa . 

Jaaney kya kardooN sitam mai wasl par ab ki dafa 

sonchkar unkaa nahaana jaan meri le gayaa 

[wasl= union, meeting] . 

un ghanerey gesuOun ki ghataa sey jhaanktaa 

Chaand jaisa uskaa shaana jaan meri le gayaa 

[shaana=shoulder] . 

woh rozaana hi guzarta tha gali se par sitam 

bejhijhak hi woh rozaana jaan meri le gayaa . 

Gardish-e-ayyam meiN ek dhool ki chaadar taley 

jab milaa ek khat puraana jaan meri le gayaa 

[Gardish-e-ayyam=sorrows of daily life] . 

Yeh ghazal jab ~Rang~ ne usko sunaai shauq sey 

baar baar uska lajaana jaan meri le gayaa . 

Wasiey nayey takhallus ka bhi ehtemaam kiya hai ~Rang~ aaindah kalaam isi takhallus sey likhoonga.

by **khajabi** » Wed Jul 24, 2002 3:21 am

ASAK, farshi salam khabool kariye, ~Rang~, accha dikhra... shukriya.

by **Radha** » Wed Jul 24, 2002 2:48 pm

ASAK, Bhirr Ustaad, Bahut Khub, \"Aap ke muhse mohabbat ki batein,Yeh Naya Rang jaan hamaari le gaya\"

by **Bhirr Ustaad** » Fri Jul 26, 2002 2:57 am

Salaamalaikum Radha, Ab yeh rang agar aapko nahiN dikhaya to yeh matlab nahiN ke hum yeh rang nahin rakhtey........Khair Ghazal pasand karney ka shukriyaa.

by **Bhirr Ustaad** » Fri Jul 26, 2002 3:00 am

Salamalaikum Khajabi,

Aapka farshi salaam khubool, jhuk key aapka haath uthatey huwey pure hyderabadi style me takalluf ke saath,....arey khajabi yeh kya karrey bhai .....kaiku aisa ghareeb ka amzakh uDaarey bhai.?..........Aapka mashkoor

Taaza ghazal - uska yeh saada bahaana jaan meri le gayaa